Slickermuul & Meckerbüddels

CityCards nu ok up Plattdüütsch

„Reinvestieren“ kennt wi ja all ut de Wirtschaft. Man ok in’t Plattdüütsch-Rebett gifft‘t dat. Verleden Jahr hett Hella Einemann-Gräbert van de BBS Wildshusen de Kulturpries van’n Landkreis Ollnborg kregen. För all ehr Warken un Doon wat „Plattdeutsch in der Pflege“ angeiht. Dat Priesgeld wull se denn weer in een neiet Projekt geven, so dat Plattdüütsch noch mehr in us Koppen un up us Tungen kaamt.

Tosamen mit de Ollnborger Landskup, de NordWest-Zeitung un de Landvolkverband sind mit Hella Einemann-Gräbert nu plattdüütsch CityCards maakt wurrn. De geev dat bitnu blots up Hochdüütsch.

Veer Karten mit plietsche Spröök un fein Motiven ut us Kuntrei sind nu överall in de Stadt Ollnborg verdeelt wurrn. Of dat een Koh mit Tungen („Slickermuul“) oder een Spröök to’n Moot maken („Sabbel nich – dat geiht“) is, de Karten schullt eenfach Pläseer maken un een beten neeschierig up de Spraak.

Een Översetten van de Spröök up Hochdüütsch is up de Achtersiet van de Kart to finnen. In Platt to investeren is up jeden Fall een Investition in de Tokunft!
De Karten sind ok över de Ollnborger Landskup to betrecken.

 Dies ist ein Gastbeitrag von Stefan Meyer

 

 

 

14.2.2018